Receitas con especias cheas de sabor

—Tomates asados con chiles, allo e xenxibre Estes tomates están boísimos de seu, só precisan un pouco de pan para mollar no aceite. Elaboración: Quentamos o gratinador do forno á máxima potencia. Mentres tanto nun cazo a lume medio botamos o aceite e engadimos o chile cortado en anacos e o xenxibre e os allos cortados en láminas finiñas. Imos remexendo e deixamos até que o allo comece a torrarse. Retiramos do lume e coamos o aceite reservando os anacos de allo, xenxibre e chile. Cortamos os tomates en toros cun grosor dun centímetro máis ou menos e colocámolos sobre unha bandexa para o forno sen que se toquen. Regámolos por enriba con dúas culleres do aceite que infusionamos e botámoslles sal en escamas e pementa negra. Metemos no forno durante uns 10 minutos até que os tomates comecen dourarse. Sacámolos do forno e botamos por enriba o resto do aceite e os condimentos que tiñamos reservados. Servimos quentes e con pirixel por enriba. Primeiro prato Tomates asados con chiles, allo e xenxibre Ingredientes (4 persoas): 75 ml de aceite de oliva 4 chiles vermellos secos 8 dentes de allo 4 tomates corazón de boi 1 anaco de xenxibre sal en escamas e pementa negra moída pirixel —Wok de tenreira galega mariñada en mencía e comiño con tomates cereixa e espárragos verdes A tenreira e as verduriñas da gornición quedan moi saborosas grazas ao viño e o comiño. Elaboración: Cortamos o solombo de tenreira en tiras de 2 cm de grosor. Mesturamos nun cunco de cerámica o viño co aceite, a salsa de soia e o comiño. Salpimentamos a carne e metémola no cunco coa mestura, deixámola unha hora a temperatura ambiente e cuberta cun film transparente para que se mariñe. Pasado este tempo cortamos os espárragos e os allos en anacos e a cenoria en láminas finas e alongadas. Botamos nun wok un pouco de aceite e engadimos os allos a lume baixo durante uns 5 minutos para aromatizar o aceite. Engadimos a cenoria e os espárragos e deixamos que se cociñen uns minutos, a continuación engadimos os tomates cereixa e cando estean todas as verduras prontas botamos a carne cun pouco da mariñada. Deixamos uns minutos até que a carne estea ao punto, é importante non pasala demasiado para que non fique dura. Segundo prato Wok de tenreira galega mariñada en mencía e comiño con tomates cereixa e espárragos verdes Ingredientes (2 persoas): 500 g de solombo de tenreira galega 250 g de espárragos verdes 250 g de tomates cereixa 1 vaso de viño Mencía 2 culleres de comiño 4 culleres de salsa de soia 1 culler de aceite de oliva 4 dentes de allo 1 cenoria ceboliño —Biscoito de mazá especiado De sobremesa temos este biscoito de mazá: zumarento, cun delicioso aroma e moito sabor. Elaboración: Mesturamos cun batedor eléctrico de globo o azucre e a manteiga durante varios minutos até obter unha crema clara e esponxosa. Engadimos os ovos e batemos até que se integren na masa. A continuación tamizamos a fariña co lévedo e o sal e engadímola aos ovos pouco a pouco intercalando coa nata aceda. Cando teñamos todos os ingredientes e a masa estea homoxénea botamos nun molde redondo desmontable duns 23 cm de diámetro. Mentres quentamos o forno a 160 graos, cortamos as mazás en medias lúas de 1,5 cm de grosor e reservamos. Mesturamos nun cunco á parte o azucre coa canela e o xenxibre e botamos nel as mazás, remexemos ben para que se impregnen e colocámolas sobre o biscoito. Metemos no forno durante 60 minutos até que o biscoito este cociñado e a superficie de mazás semelle dourada e crocante. Sacamos do forno e deixamos repousar media hora antes de desmoldar. Sobremesa Biscoito de mazá especiado Ingredientes (6 unidades): Para a masa: 3 ovos grandes lixeiramente batidos 130 g de manteiga à temperatura ambiente cortada en cubos 300 g de fariña de trigo 200 g de nata aceda ou iogur natural 150 g de azucre 1 culleriña de sal 6 g de lévedo en pó Para a cobertura: 3 mazás verdes 1 culler de canela en pó 1 culleriña de xenxibre en pó 100 g de azucre moreno &rsaquo; fogonsdetonaanxo.gal