Olla que cousa máis linda

Boliños de bacallau Os boliños de bacallau son unha tapa moi famosa en Portugal e en Brasil, como entrante ou como petisco son deliciosos. Ingredientes (12 unidades): 500 g de patacas, 350 g de bacallau desalgado, 1/2 cebola, 1 culler de fariña de trigo, 2 dentes de allo, pementa moída, pirixel fresco, 1 ovo, aceite de xirasol para fritir Elaboración: Colocamos o bacallau desalgado nunha pota e cubrímolo con abundante auga. Poñemos a pota ao lume e cando comece a ferver deixamos 15 minutos. Cando o teñamos cociñado retiramos e reservamos. Lavamos as patacas e cocémolas na auga onde cocemos o bacallau, botámolas enteiras e deixamos cocer uns 30 minutos, dependendo do tamaño. Picámolas cun garfo e ver se están brandiñas, se é así escorrémolas e pasámolas por auga fría para non queimarnos. Mentres arrefrían as patacas cortamos a cebola en dados finos e cun chisco de aceite sofritímola nunha tixola. Botámoslle sal e deixamos a fogo baixo até que se poña transparente, engadimos o allo ben picadiño e continuamos refogando. Pelamos as patacas e esmagámolas ben cun garfo até ter unha especie de puré. Por outro lado retiramos a pel e as espiñas do bacallau e esfiámolo con dous garfos. Outra opción para esfialo é colocalo nun pano de cociña limpo e e amasalo coas mans para que se desfaga de todo. Engadimos o bacallau esfiado á tixola coa cebola e o allo e refogamos uns minutos, botámoslle o puré de pataca e seguimos remexendo. Incorporamos tamén a culler de fariña, peneirándoa para evitar que se formen bolos, e mesturamos todo ben. Apagamos o lume e picamos ben finiño unhas ramiñas de pirixel. Botámolo na tixola con pementa moída ao gusto e engadimos o ovo enteiro. Integramos ben todos os ingredientes, ben coas mans ou ben con dúas culleres. Sacamos a masa da tixola e deixamos arrefriar: podemos facela dun dia para o outro se deixala na neveira cun filme transparente para que estea ben fría. Para facer os boliños, mollamos un chisco as mans con auga e collemos anacos de masa cunha culler e formando bolas coas palmas até que estean redondiños. Finalmente botamos nun cazo o aceite de xirasol para fritilos, o suficiente para cubrir ben os bolos e que se cociñen por todas partes. Cando o aceite estea ben quente imos botándoos ao poucos e fritíndoos até que estean douradiños. Colocámolos nun papel absorbente para tirar o exceso de aceite e servimos quentes. Podemos botarlles por enriba un chorro de lima para darlles máis sabor. Strogonoff de polo ao estilo brasileiro Strogonoff de polo ao estilo brasileiro O Strogonoff é un prato de orixe rusa, feito con carne de tenreira, que se converteu nun clásico na gastronomía brasileira. Alí o máis común é o de polo pero tamén se pode comer de tenreira ou de lagostinos. Ingredientes (4 persoas): 500 g de peituga de polo, 2 dentes de allo, 1/2 cebola, pementa moída, 1 culler de sopa de ketchup, 1 culler de sopa de mostaza, 200 ml de nata para cociñar, 200 g de salsa de tomate, aceite de oliva, arroz branco e patacas palla para acompañar, sal. Elaboración: En primeiro lugar cortamos a peituga de polo en dadiños de tamaño medio, botámoslle sal e pementa moída e reservamos. Picamos a cebola en brunoise ben fina e o allo en cadradiños pequenos. Nunha tixola cun chisco de aceite de oliva douramos os cubos de polo, e cando comecen a coller cor retirámolos e reservamos. Engadimos na mesma tixola a cebola e o allo, botámoslles un sal e refogamos a lume baixo até que se cociñen. Cando teñamos a cebola transparente e ben pasadiña, volvemos incorporar o polo á tixola e botámoslle a culler de ketchup, a de mostaza e o mollo de tomate. Deixamos cociñar a fogo medio durante uns 5 minutos e botamos tamén a nata, remexemos ben para integrar os mollos e cociñamos outros 5 minutos. Servimos quente con arroz branco e patacas palla de gornición. Brigadeiros de chocolate e coco. Brigadeiros de chocolate e coco O brigadeiro é un doce moi famoso no Brasil. Adoita facerse na casa para eventos festivos. Os orixinais cóbrense con chocolate pero hai gran cantidade de versións. Ingredientes (4 persoas): 395 g de leite condensado, 20 g de cacao en po, 20 g de manteiga en punto de pomada, coco relado, 100 g de fideos de chocolate. Moldes: Formas de magdalenas de 8cm de diámetro. Elaboración: Para comezar a preparación untamos unha bandexa con manteiga e reservamos. Nun cazo botamos o leite condensado e o cacao, remexemos cunha culler de pau para disolvelo. Engadimos a manteiga en punto de pomada e cociñamos a fogo baixo, remexendo con movementos circulares constantemente até que cambie a textura e espese. Retiramos do lume e estendémolo ben na bandexa. Deixámolo arrefriar de todo e metémolo na neveira un pouco para que poidamos traballalo mellor. Logo botamos nun cunco a reladura de coco e noutro os fideos de chocolate, para rebozar as boliñas de brigadeiro. Untando de manteiga as mans e coa axuda dunha culler de café imos collendo a masa e facendo bolas . A seguir botámolas nos cuncos para rebozalas, unha metade de coco e outra cos fideos de chocolate. Finalmente colocámolos nos moldes de papel e xa podemos desfrutar desta delicia.