Imos xantar a Italia?

Queixo provolone ao forno O queixo provolone é un queixo típico do sur de Italia que ten un sabor máis intenso e saboroso cando se derrete, por iso é ideal para pizza ou pastas, e incluso só cun pouco de pan é un entrante exquisito! Ingredientes (2 persoas): 1 toro de queixo provolone (150 g aprox); 1 allo; ourego seco; aceite. Elaboración: Pelamos o dente de allo e cortámolo en dous anacos. Refregámolo ben por unha tarteira pequena ou algún recipiente apto para o forno e que teña un diametro similar ao do queixo. Colocamos o queixo sobre a tarteira, botámoslle un chorriño de aceite por enriba e o ourego seco. Metémolo no forno que previamente quentamos a 180 graos durante uns 10 minutos até que se derreta e a continuación outros 5 minutos co gratinador para douralo. Retiramos do forno con cuidado de non queimarnos e servimos no mesmo recipiente, ben quentiño e acompañado con pan para mollar. A case auténtica pasta carbonara Estamos acostumados a ver a salsa carbonara feita con nata, pero a auténtica receita é moito máis saborosa, faise só con ovos, queixo e touciño entrefebrado curado. Aínda que a receita orixinal non leve cebola a min gústame moito como queda con ela e adoito engadirlla, por iso a receita é "case auténtica". Ingredientes (2 persoas): 180 g de espaguetes; 3 ovos; 2 cebolas; 200 g de touciño entrefebrado en tiras; 50 g de queixo pecorino ou parmesano en pó; pementa negra moída Elaboración: Pelamos e cortamos a cebola en taquiños pequenos, rustrímola a lume baixo nunha tixola cun pouco de aceite e sal até que estea ben pasada. Engadímoslle o touciño entrefebrado e dourámolo xunto coa cebola, cando estea listo sacamos do lume e reservamos. Nun cunco botamos os ovos e batémolos, engadimos o queixo en pó e remexemos cun garfo até que se integren, debería quedar bastante espeso. Botámoslle pementa negra moída por enriba e voltamos mesturar todo, deixamos repousar uns minutos. Poñemos a cocer os espaguetes con abundante auga e un pouco de sal durante 10 minutos aproximadamente, cando estén ao punto escorrémolos e voltamos botalos na pota onde os cocimos pero sen estar ao lume. Botámos por enriba a cebola co touciño e a continuación a mestura de ovo con queixo. Remexemos todo ben até que calle o ovo e o queixo co calor da pasta. Servimos cun chisco de pementa negra moída por enriba. Vasiños de tiramisú O tiramisú é unha sobremesa da cociña italiana que conquistou o mundo enteiro. Trátase dunha receita moi sinxela e vistosa feita con queixo mascarpone e biscoitos emborrachados. Eu emprego biscoitos comprados porque o resultado é semellante e axilizan o traballo, pero tamen podemos facelos nós mesmos. Ingredientes (6 unidades): 10 biscoitiños de soleta; 500 g de queixo mascarpone; 2 ovos; 30 g de cacao en pó puro 100%; 80 g de azucre; café Elaboración: Facemos unha cafeteira mediana de café, e agardamos a que arrefríe. A continuación separamos as xemas das claras. Imos montar as claras pouco a pouco subindo a velocidade do batedor de globo eléctrico até que estean listas. Botamos nun cunco as xemas co azucre e batemos cun batedor de globo eléctrico uns 5 minutos ou máis até que se desfaga ben o azucre e as xemas cambien a cor branqueando. Remexemos un pouco o queixo mascarpone para que se integre mellor co resto dos ingredientes e mesturámolo coa xemas. A continuación engadimos as claras montadas e mesturamos con movementos envolventes para evitar que perdan aire. Co café xa frio emborrachamos os biscoitos de soleta e colocámolos na base dos vasiños, como son máis grandes que os vasos cortámolos en anacos para axeitalos. Neste caso fixemos pequenos tiramisús pero poderíase facer todo xunto nunha bandexa grande se se prefire. Cubrimos os biscoitos coa crema de queixo mascarpone e cun coador botamos o cacao en pó por enriba. Servimos ben frío.