Da nosa horta a Bruxelas pasando por Nova Deli

—Vinagreta de pistachos con tomates da horta Esta vinagreta é diferente, cun toque crocante e fresco, queda xenial cos tomates pero tamén é perfecta para transformar calquera ensalada. Elaboración: Comezamos triturando os pistachos cunha picadora pero non demasiado, deixamos diferentes grosores para darlle máis textura á vinagreta. A continuación engadimos o aceite, o vinagre e a culler pequena de mostaza. Mesturamos todo ben cun garfo até que se integre e deixamos repousar un chisco na neveira. No momento de servir lavamos e cortamos os tomates en anacos e decoramos por enriba coa vinagreta, un chorriño de aceite e un pouco de pementa negra moída. —Tofu tikka masala Aínda que o tikka masala máis coñecido se fai con polo, a versión vexetariana deste coñecido prato da cociña india é unha opción igual de deliciosa e chea de sabor. Elaboración: En primeiro lugar secamos o tofu cun pano de papel e cortámolo en cubos duns dous centímetros de tamaño. Nun cunco mesturamos o iogur coa cúrcuma, o xenxibre en po, o pemento picante, o garam masala, o cardamomo e o cravo. Cando teñamos integrado o iogur coas especias engadimos o tofu e deixámolo mariñando na neveira unhas 2 horas como mínimo. Unha vez mariñado o tofu, poñemos o arroz a cocer con abundante auga, e cando comece a ferver deixámolo 12 minutos e escorrémolo. Mentres facemos o arroz, pelamos os allos e o xenxibre e relámolos. Cortamos tamén a cebola en cadradiños moi finos e comezamos a preparar o mollo. Para iso botamos nunha tixola un chisco de aceite, e douramos o allo e o xenxibre, a continuación engadimos a cebola picada e cando comece a estar transparente engadimos o tofu sen a mariñada. Salteamos ben o tofu por todos os lados uns minutos e retiramos. Imos sacar as sementes de cardamomo e o cravo e incorporar a mariñada á tixola xunto co comiño, a caiena e o tomate triturado. Deixámolo cociñar durante uns cinco minutos, botamos o leite de coco e integramos ben co resto do mollo. Cando o teñamos case preparado volvemos incorporar o tofu e deixamos cociñar uns últimos minutos. Finalmente servimos nun prato o arroz do lado do tofu e decoramos por enriba con pirixel picado ou coandro. Podemos acompañar tamén con pan pita. —Mousse de bolachas lotus Estas bolachas son unha delicia, soas ou acompañadas. Preparamos con elas unha mousse que vos vai deixar apaixonados. Elaboración: Comezamos preparando a crema de lotus. Imos reservar 6 bolachas para decorar e trituramos o resto cunha picadora. A continuación pesamos 125 g deste po de lotus e engadímoslle a manteiga derretida, o leite e o leite condensado. Mesturamos ben cunha culler e coa axuda dun batedor eléctrico acabamos de conseguir ben a textura desexada. Cando teñamos unha crema ben integrada reservámola e continuamos batendo a nata cun batedor de globo. Comezamos a baixa potencia, para máis tarde agregar o azucre glas e ir subindo pouco a pouco até que comecemos a debuxar sucos. Noutro cunco á parte botamos o queixo crema e engadímoslle a metade da crema de lotus, remexemos ben coa axuda dunha lingua até que fique homoxénea. Logo incorporamos a nata batida pouco a pouco e imos remexendo coa lingua con movementos envolventes. Unha vez preparada a mousse xa podemos servir a sobremesa. Imos colocala en vasiños individuais, para iso botamos unha cama de area de bolacha, a continuación a mousse e por enriba rematamos co restante da crema de lotus. Finalmente decorámolas cun pouco de po e unha bolacha partida pola metade e deixamos arrefriar un chisco na neveira antes de comelas.