Máis un ano, a Academic Ranking of World Universities inclúe a Universidade de Santiago de Compostela entre as 500 mellores universidades do mundo. O estudo, máis coñecido polo nome de ranking de Shangai, sitúa a compostelá entre as 401 e 500 mellores universidades. Ningunha outra galega aparece recollida neste estudo, que lideran as norteamericanas Harvard, Stanford, o Instituto Tecnolóxico de Massachusett e a de California Berkeley.
A nivel estatal, esta listaxe inclúe outras doce universidades, moitas das cales son catalás. A Universidade de Barcelona é a primeira, ao situarse entre as posicións 151 e 200, seguida da Universidade Autónoma de Barcelona e da Universidade Autónoma de Madrid. A continuación, sitúanse a Complutense, a Pompeu Fabra, a Politécnica de Valencia, a Universidade de Granada, a Universidade de Valencia e a Politécnica de Cataluña. Tamén aparecen entre as 500 mellores a Universidade do País Vasco e a de Zaragoza.
Este estudo emprega seis indicadores para estabelecer a clasificación: o número de alumnado e profesorado gañador dos premios Nobel e medallas Fields, o número de investigadores e investigadoras altamente citadas, o número de artigos publicados nas revistas Nature e Science, o número de artigos indexados no Science Citation Index-Expanded (SCIE) e Social Sciences Citation Index (SSCI) e mais o rendemento per cápita respecto ao tamaño dunha institución.
