luns 26/10/20
A XUNTA Só FACULTA áS GUíAS TURíSTICAS

Arqueólogas e historiadoras, excluídas do labor de mostrar os bens de interese cultural

Nin profesionais da Historia, nin da Arqueoloxía, nin da Xeografía poden desde o mes de maio amosar, como viñan facendo, o patrimonio catalogado como Ben de Interese Cultura (BIC). Un decreto do Goberno galego só lles outorga esta facultade ás persoas con titulación de guía turística.

[Imaxe: Turgalicia]
[Imaxe: Turgalicia]

Malia que en maio de 2015, a Xunta de Galiza publicou o Decreto 73/2015 polo que se regula a profesión de guía de turismo de Galiza, non foi até o de agora cando os e as profesionais da Historia, da Arqueoloxía ou da Xeografía comezaron a se mobilizar. O malestar de persoas historiadoras, arqueólogas e xeógrafas débese a que a normativa impulsada polo Goberno galego de maneira unilateral impide que cobren por acometer os labores de divulgación polos que viñan cobrando até o de agora.

En base ao decreto, a Xunta de Galiza só lles permite ás persoas tituladas como guías turísticas a amosar patrimonio galego catalogado como Ben de Interese Cultural. Unha arqueóloga vinculada á Asociación Empresarial Galega de Arqueoloxía (AEGA) afirma, en declaracións a Sermos Galiza, que “ao principio, cando saíu o decreto, non lle demos a menor importancia porque pensamos que non se cumpriría, mais nestes meses tivemos a oportunidade de ver como a Dirección Xeral de Turismo nos despraza as persoas expertas en patrimonio cultural”.

"As arqueólogas, historiadoras ou xeólogas non queremos facer o traballo de guía, o noso é un labor didáctico

Esta arqueóloga explica que desde o sector “facemos visitas didácticas explicando os bens, non organizamos excursións de carácter turístico”. “Até o de agora, calquera historiador ou historiadora podía cobrar por organizar unha visita didáctica a unha fortaleza para explicar as súas características, mais agora, para o facer, ten que contratar un guía ao que lle transmite os seus coñecementos para que este, á súa vez, llo transmita ás persoas visitantes”, denuncia. “Para eu poder cobrar por facer unha visita a uns petróglifos tería que pagarlle a unha guía á que eu mesma lle explicaría as características arqueolóxicas para que esta llo explicase ás persoas visitantes. É un despropósito e unha situación ridícula de todo”, insiste.

“Ao colectivo de arqueólogos parécenos perfecto que a Xunta trate de garantir o traballo das persoas guías turísticas para acabar co intrusismo, mais nós, as arqueólogas, historiadoras ou xeógrafas non queremos facer o traballo de guía, o noso é un labor didáctico”, defende. Ademais, sinala que “non ten sentido ningún que calquera de nós, para cobrar por realizar visitas, teña que titularse como guía turística e teña que aprender inglés ou alemán. Eu non quero ser guía e ninguén me ten que obrigar ensinarlle os xacementos arqueolóxicos de Galiza en inglés aos galegos e galegas”.

Israel Picón: "Quen mellor que nós, os arqueólogos, para explicar uns xacementos que nós mesmos escavamos"

Tamén lle preguntamos ao presidente da AEGA, Israel Picón, quen reivindica que “o patrimonio é de todos e todas, e quen mellor que nós, os arqueólogos, para explicar uns xacementos que nós mesmos escavamos”. O responsábel da AEGA advirte de que a situación que padecen as persoas que se dedican de maneira profesional á arqueoloxía é “xa de por si crítica, coa irrupción de persoas voluntarias, como para que a Xunta de Galiza nos coute máis o labor que podemos desenvolver”.

A finais desta semana, os colectivos afectados polo decreto que regula a actividade de guía turística manterán unha reunión para tratar de facer unha fronte común coa que combater o contido da normativa.

comentarios