Chantada vai ser mañá sábado, día de Todos os Santos, o fervedoiro onde calquera que desexe deixar de lado Samaíns-Hallowens, etc... para pasar horas de paixón e festa ten que estar. No Castañazo rock, que chega á súa XII edición cun cartel para quitar o hipo.
A xornada comezará a media mañá co Castañazo infantil: música, teatro, castañas e diversión a eito! Para @s pequen@s e non tan pequen@s. Ás 15:00 comezan os cantos de taberna, tres horas para percorrer dez baiucas mollando a palleta nun concurso que cada ano vai a máis. Unha hora despois é a cita co aberto de billarda, ás 18:00 horas cos xogos bravús e a partir das 20:00, o magosto.
A ferver!
E xa pola noite, concertazos, sete conxuntos para facer ferver o interior do país. Procedentes de Bosnia chegan Dubioza Kolektiv, unha caldeirada de ska, rocko, música balcánica para ser triturada a base se suor e baile, moito baile. Son o grupo que deixou pampos os asistentes a festivais europeos deste verán. Impresionantes.
Outro prato forte son os ‘Gatillazo’, con Evaristo (ex-La Polla Records) á fronte. Desde EH rock de combate e mala hostia. Desde Italia chegan Talco, uns vellos coñecidos do Castañazo, pura enerxía e afouteza skatalítica. La Raíz son outro dos grupos. Once persoas sobre o escenario a mesturar hip hop, reggae, rock e o que faga falta.
Armada galega
E a armada galega neste Castañazo é de órdago: a Fanfarria Taquikardia, Maskarpone e Machina. Tres propostas diferentes mais igualmente apaixonantes.
