Cando en outubro de 2011 os organizadores do festival Primavera Sound de Barcelona anunciaron na casa do concello do Porto a posta en marcha dun xemelgo na cidade portuguesa, foron moitos os afeizoad@s á música na Galiza que bateron palmas ante a perspectiva de gozar dos grandes nomes da música independente. Wilco, Beach House, Flaming Lips, Saint Etienne, Yann Tiersen, Suede…farán que do 7 ao 10 de xuño a centos serán os carros galegos con destino Porto.
Ben é certo que este xemelgo naceu despois e ten un tamaño máis reducido pero tamén é verdade que a entrada custa a metade que a de Barcelona: 99 euros máis gastos o abono do Porto fronte a 195. Tamén é máis accesible en canto que a oferta non é tan desacougante como a de Barcelona xa que é imposible atracarse co menú do Parc del Forum composto por máis de 250 shows.
A celebración do Optimus Primavera Sound supón unha oportunidade de expansión para a organización do festival catalán, un dos máis importantes de Europa na actualidade cun orzamento de máis de sete millóns de euros e máis de cen mil asistentes na pasada edición. En Portugal, onde as previsións achéganse ás vinte e cinco mil persoas, contan co apoio do concello e Cámara de Comercio do Porto e o patrocinio fundamental da compañía de telefonía Optimus, asi como o traballo in situ da produtora Ritmos, a mesma que xestiona outro clásico do verán portugués, o festival de Paredes de Coura. O artista João Paulo Feliciano encargouse da ambientación do Parque da Cidade. Se a entente funciona, os organizadores do Primavera contan con que a sucursal do Porto mantéñase tres anos nunha primera fase.
Non se precisan directrices para gozar dos setenta concertos e da cidade durante esa longa fin de semana, mais en Sermos temos ousadía e non podemos resistirnos ás suxestións:
Clásicos festivaleiros. Sempre é unha experiencia asistir ás tolerías de Wayne Coyne, de Flaming Lips, en directo. A volta de Suede aos festivais e o pop electrónico de Saint Etienne sube ao palco a dous clásicos británicos. Que dicir de Wilco? Fagan o que fagan, os de Chicago xa teñen a audiencia gañada. Tamén dos Estados Unidos chegan Yo la tengo e os seus vinte e cinco anos de andaina musica.
Os figuras. O francés Yann Tiersen, un dos grandes europeos, imprevisible e experimental, estará na xornada inaugural. Rufus Wainwright (con banda), que nesa altura xa fixo triplete en Galiza (Santiago 2008, Vigo 2010 e A Coruña 2012) tamén se sube ao Palco; o ex Sonic Youth Lee Ranaldo, que cancelou o pasado decembro o seu show na Cidade da Cultura, estará coa súa poesía ruidista no Porto e Jeff Mangum, da desaparecida banda Neutral Milk Hotel, ofrece dous shows na Casa da Música o domingo 10. Malia ser día de despedida, non será doado conseguir entrada.
A maior banda de rock do mundo. Cen músicos do Porto enriba dun escenario? Si, a StopEstra. Mágoa que estea programada para as cinco da tarde do xoves 7 de xuño; boa parte da audiencia aínda non chegou ao festival. Todo un espectáculo, se non ollade esta actuación na Casa da Música: http://www.youtube.com/watch?v=hZ8t9NeW82M
A praia do Porto. Si, a cidade portuguesa ten areais preto da Parque da Cidade, recinto do festival no que con seguridade unha das bandas triunfadoras será Beach House (precisamente, a casa da praia). Só queda cruzar os dedos e que o tempo acompañe a estadía nunha cidade na que, malia que non haberá horas no día, paga a pena mergullarse.
Todo o programa do Optimus Primavera Sound:
http://www.optimusprimaverasound.com/
