O secretario xeral do PSdeG, Valentín González Formoso, animou a todas as galegas e galegos a votar este 28 de maio e a "gozar con paixón, normalidade e con respecto por todas as formacións políticas".
Tras depositar o seu voto nas Pontes, Formoso reivindicou o que para el é "un día de celebración".
"A festa da democracia, na que expresar o seu sentimento político, as súas conviccións, de forma tranquila", comentou.
O secretario dos socialistas galegos lembrou que houbo tempos nos que "non sempre se tivo a oportunidade de ir votar", motivo polo que fixo un chamamento á participación.
"A cidadanía é madura, solvente e responsable", asegurou o líder socialista, "sabe que o dereito a voto é máis unha obriga", engadiu.
Para Formoso "a posibilidade de cambiar o país, o municipio, tense que concretar metendo un papel nunha urna".
Neste sentido, lembrou que este dereito "non sempre estivo garantido" polo que "por aqueles que o deron todo para garantir o dereito para votar, temos que buscar un oco e cumprir co pasado, o presente e o futuro do país", argumentou.